一啖天文 2017.12

iheby

一啖天文（20）－月食 康芷欣
20171220

上次就講完日食啦，今次就講埋月食啦。

月食，一個發生係當月球運行至地球嘅本影果陣嘅特別月相。而咩係本影嘅呢？地球係背著太陽嘅方向嗰陣會出現一條陰影，而呢個地影就會分為本影同半影兩部分（圖一），而本影嘅地方太陽係直射唔到架。

月食（圖二）係必定會發生係滿月嘅夜晚（農曆十五左右），而日食就會發生係新月（農曆初一左右）。但係同日食一樣，月食要係太陽、地球、月球係同一條直線上先會發生嘅。咁月食同日食究竟有咩分別呢？係月食入面，月球係地影內，所以唔可以被太陽直射，我地自然睇唔到月球所反射嘅太陽光。至於日食方面，月球遮住部分太陽原本射係地球嘅光線，所以我地睇到嘅係唔發光嘅月球遮住太陽嘅一部份或者全部。

月食就只係得三種，月全食、月偏食同半影月食。佢係冇月環食架，因為佢個本影遮晒成個月球，所以會變月全食。

月食過程：半影月蝕、初虧、蝕既、蝕甚、生光、復圓、半影食終
月偏蝕係冇蝕既、生光過程；半影月蝕係冇初虧、蝕既、生光、復圓過程。

黎緊係2018年1月31號就會有月全食，到時大家可以做好準備去石澳、大帽山山頂等睇啦????

圖一

圖二

參考資料:維基百科、香港天文台
圖片來源:天文台 Dorothy Fung

iheby

「一啖天文」(21) - 太空垃圾 Yuen Hoi Hang
20171221

喺地球大氣層外面，除左有唔同既天體，亦都有好多人造既物體，例如人造衛星同航天工具。但當呢啲人造天體失效既時候，佢地就會變成好致命既武器 - 太空垃圾。

太空垃圾(Space debris)係指一啲喺地球軌道運行，但唔具備任何用途既人造物體。呢啲物體包括報廢既人造衛星、被遺棄既火箭、好微細既火箭燃料殘渣，又或者係太空人既工作手套。

雖然大部分既太空垃圾都會因為地球既引力影響而跌落太氣層並且燃燒殆盡，但地球軌道上依然存在超過4500噸 (相當於太約3500架私家車重量) 既太空垃圾。

而太空垃圾既危險之處，就係會同國際太空站或者正常運作既人造衛星發生碰撞。雖然好多既太空垃圾都細過1毫米。但佢地既環繞地球既速度，最快可以達到每秒8公里，足夠對太空人造成致命傷害，又或者可以導致人造衛星失靈。而一嚿直徑10厘米既太空垃圾，就足夠完全摧毀一個航天儀器。國際太空站亦不時因為要避開太空垃圾而改變航道。

根據凱斯勒現象 (Kessler Syndrome)，假如太空垃圾持續增多既話，人造衛星或者其他航天工具就會失去能夠安全運行既軌道。喺之後既數百年內，都冇辦法再進行任何太空探索或者發射人造衛星。

如果大家想了解多啲太空垃圾同佢會帶嚟既危險，就可以去睇下《引力邊緣》(Gravity) 喇!


圖1：太空垃圾既分佈示意圖。其中有兩個主要既分佈帶：位於地球靜止軌道上既環狀帶同位於近地軌道上既雲狀帶。

參考資料、圖片來源：Wikipedia

iheby

一啖天文（22）- 赫羅圖 Mei Wong
20171222

話說丹麥天文學家 赫茨普龍 同美國天文學家 羅素 都係度諗天上面咁多星星，佢地會唔會有規律或者共通點呢？而佢地就諗到個方法—按照恆星嘅基本性質:如溫度、光度、半徑、質量、年齡，再作出整理。而圖一就係以佢地兩位命名嘅 赫羅圖。(圖一)

赫羅圖係恆星嘅光譜類型同光度嘅關係圖，縱軸係光度同絕對星等，而橫軸則係光譜類型同恆星嘅表面溫度，從左至右遞減。而恆星嘅光譜型可大概分為O.B.A.F.G.K.M七種。

赫羅圖除左可以睇到個粒恆星嘅基本性質外，仲可以顯示恆星嘅演化過程嫁。(圖二、三)

大約90%嘅恆星位於赫羅圖左上角至右下角嘅帶狀上，而呢條線叫主序帶。好自然咁，位於主序帶上面嘅恆星就叫做主序星。而係主序帶上嘅恆星，係按照質量大小排列嘅。喺左上方，高溫高亮度嘅係質量比較大嘅恆星，而喺右下方低溫低亮度嘅就係小質量嘅恆星。

形成恆星嘅分子雲位於圖中極右嘅區域，但隨住分子雲開始收縮，溫度開始上升，就會慢慢移向主序帶。

恆星臨終個陣會離開主序帶，咁佢哋就會向右上方移動，姐係表面溫度低但光度高嘅恆星，紅巨星同紅超巨星嘅區域。

經過紅巨星但未發生超新星爆炸嘅恆星就會越過主序帶移向左下方，姐係表面溫度高而光度低嘅區域，白矮星嘅所在區域，接著會因為能量嘅損失，漸漸變暗成為黑矮星。

如果想睇翻恆星生死同光譜可以去翻上幾啖重溫呢！

圖一

圖二

圖三

參考資料: Wikipedia
圖片來源: 中研院天文所季報

iheby

「一啖天文」(23) - 銀河系 Dorothy Fung
20171223

大家又有冇諗過太陽系外面仲有啲咩野呢？佢地又係生成咩野樣加呢？

銀河星系係包含太陽系既一個棒旋星系，英文叫做Milky Way Galaxy。咁係因為係地球觀看既時侯，佢係橫跨夜空既黯淡發光帶，並呈現乳白色既帶狀。銀河系既直徑非常之寬，估計入面有1,000億至4,000億粒恆星，而太陽系係位於獵戶螺旋臂既內側邊緣。

銀河有住相對較低既面亮度。它既可見度會被背景光，就好似光污染或者黎自月球既雜散光大大咁降低。當肉眼可見既極限星等大約係+5等就可以見到銀河，更好既+6等，就可以見到好多細節。因此係明亮既都市或者郊區都好難見到銀河，但當月球係地平線下，係冇光污染既鄉村地區就可以睇到好明顯既銀河。

下次去睇星既時候，大家不妨去到少光污染既地方，落足眼力嘗試去搵銀河啦！

圖一: 藝術家想像的銀河系結構

圖二: 夏季銀河

圖三: 冬季銀河

參考資料: wikipedia
圖片來源: nasa, matthew chin, mew chu

iheby

一啖天文（24）－星雲 康芷欣
20171224

唔知大家有冇聽過星雲呢？又知唔知佢係點黎架呢？今日就講下佢啦。

星雲其實係指星際空間入面嘅模糊斑點或雲霧狀嘅天體，由氣體同塵埃微粒所組成，星雲中嘅物質密度非常稀薄，但由於星雲體積龐大，因此雖然密度細，但總質量就好大。而星雲入面就有塵埃、氫氣、氦氣、同其他電離氣體聚集形成。

唔同嘅星雲，都有唔同嘅形態。而佢嘅形態主要分做3個類型，分別係瀰漫星雲、行星狀星雲、超新星殘骸。

大多數星雲都可以話係瀰漫星雲，因為大多數嘅星雲都係分散嘅，冇明確嘅邊界。而佢地仲可以再細分為發射星雲、反射星雲、暗星雲。如果要分別發射星雲同反射星雲嘅唔同，就要睇下佢地係點發光啦。

發射星雲（Emission nebula）：星雲嘅氣體受中心處或附近高溫恆星嘅輻射激發，令星雲本體發光，就好似獵戶座嘅獵戶星雲（M42）（圖一）。

反射星雲（Reflection nebula）：星雲反射或散射周圍附近低溫恆星嘅輻射而發光，而成為明亮的星雲。如獵戶座嘅獵戶星雲（M78）（圖二）。

暗星雲（Dark nebula）：因為佢唔會發射同反射任何嘅光線，所以我地只會睇到一片黑暗。如獵戶座馬頭暗星雲（B33）（圖三）。

而行星狀星雲係低質量就黎巨星分支嘅恆星轉化成白矮星果陣，係外殼拋出嘅氣體形成嘅星雲。

而超新星係大質量恆星終止佢嘅生命果陣就會變成呢種膨脹嘅氣殼。當核心嘅核聚變停止，恆星就會坍縮，墬入內部嘅氣體獲得大量嘅能量，令恆星爆炸性嘅向外擴展膨脹嘅氣殼形成超新星殘骸。

星雲嘅顏色其實係取決於化學組成同被電離嘅數量。發射星雲含有大量嘅氫，而氫原子被激發之後就會釋放紅光波段嘅輻射，所以大多發射星雲會係紅色嘅。如果係其他元素被高能量激發，就會係其他顏色。

圖一

圖二

圖三

參考資料：維基百科、香港天文台
圖片來源：維基百科

iheby

「一啖天文」(25) - 旅行者金唱片 Yuen Hoi Hang
20171225

宇宙之大，有人認為除左地球之外，會有其他有文明存在既星球。地球人為左比外界文明知道我地既存在，發射左一隻喺地球上買唔到既唱片 - 旅行者金唱片。

旅行者金唱片係跟隨住旅行者1號同旅行者2號被發射上太空，目的係向外太空既其他生物訴說我地人類身處既世界。佢係以先鋒號鍍金鋁板為基礎，並且設計成一個更加複雜同詳細既訊息板。

旅行者金唱片既內容包括115幅圖像、多種大自然既聲音、55種語言講出既祝福句子、一首90分鐘來自唔同文化既歌曲，以及美國第39任總統Jimmy Carter既訊息。除此之外，唱片封面亦標示左太陽既位置同唱片既使用方法(圖3)。

雖然佢既目的係比其他外星生物發現，但要實行就非常之困難。喺佢跟隨既2艘旅行者號，最快都要用40000年先可以到達距離地球最近既恆星 - 半人馬座比鄰星。但咁樣都唔代表會有外星文明接收呢張唱片。可能到有朝一日，地球人會發展出更犀利既航天科技，去接收返呢一張歷史遺物。

圖1：旅行者金唱片

圖2：旅行者金唱片封面

圖3：唱片封面解讀

參考資料、圖片來源：Wikipedia

iheby

「一啖天文」(26) - 雙星 Dorothy Fung
20171226

大家會唔會喺睇星既時候，會發現一啲癡得好埋既恆星呢？呢啲我地就叫做雙星喇！

當兩粒恆星由地球上觀察時，係視線既方向上非常接近，以致用肉眼睇黎好似只有一粒恆星，但用望遠鏡時又可以睇到係一對既恆星，咁就被稱為雙星啦。呢種情況可以發生係一對聯星，亦即係有住互動既軌道，並且被彼此既引力束縛埋一齊；又或者可以係光學雙星，呢兩粒恆有唔同既距離，但咁啱係天空中相同既方向上被對準係埋一齊。

成對既恆星有以下三種：
光學雙星：係無關聯既恆星 － 只係從地球睇過去佢地咁啱對齊係一齊；
目視聯星 ：被引力束縛埋一齊，使用光學望遠鏡先可以分辨既恆星；
非目視聯星 ：要使用更專業既工具，例如掩星（食雙星）、光譜（光譜聯星）、或異常既自行（天測聯星）先可以分辨既聯星。

視力正常既人可以係開陽既正東方睇見一粒稱為輔既伴星，佢既視星等為3.99等。呢兩粒星曾被稱為馬和騎士，而傳統上係會以第二粒星黎做視力既測量。



資料參考：Wikipedia
圖片來源：台灣wiki

iheby

一啖天文（27）-星流跡 Mei Wong
20171227

大家平時見到嘅星流跡，就係影梗星星嘅軌跡(片一)。利用相機透過定時曝光拍攝，例如每25秒影一張，一共影70張，再使用後製軟件(例如:Startrials)進行疊相，一張星流跡嘅相就誕生啦！(圖一，二，三)

除左正規嘅星流跡相之外，螺旋形星星流跡都幾靚嘅。係透過Zoom in或者Zoom out(即所謂嘅拉爆) 方式整成嘅，如果冇Zoom machine，咁就要用人手扭動鏡頭，喺大約2小時嘅總曝光時間內平均咁扭動約10mm 嘅焦距，都幾考耐性同功夫。不過其實後製都整到嘅，用After Effect/Photoshop ，同時亦可以控制旋轉的方向。(圖四)

片一

圖一

圖二

圖三

圖四

參考資料: 攝影入門 、Fracis So
圖片來源: Laurence Ng、 Mei Wong、Fracis So

iheby

一啖天文（28）－星團 康芷欣
20181228

上次就講完星雲啦，不如今次就同大家介紹下星團啦。

星團其實即係恆星集團又或者行星雲。而佢可以分為兩種，分別係球狀星團同埋疏散星團。

球狀星團係圍繞住星系核心黎運行嘅。而佢顧名思義就係球狀嘅成團。咁點解佢又會係球狀架呢？其實係因為恒星被重力束縛住，而佢嘅高度向中心聚集，所以會係球狀。 通常球狀星團入面嘅恆星都係一啲好老嘅第二星族星（幾億歲）同埋少數嘅藍掉隊星。有啲光啲嘅球狀星團其實係可以用肉眼去睇，就好似奧米茄星團（圖一）咁。

而疏散星團同球狀星團嘅形狀係完全唔同架，就好似金牛座的昴宿星團（圖二）同畢宿星團（圖三）咁。佢哋局限係銀河平面，而且好多都係係螺旋臂入面被發現。係疏散星團入面嘅恆星通常都係好後生（幾千萬歲），除咗M67。雖然疏散星團散佈係高達30光年直徑嘅區域入面，但通常都係得幾百粒恆星。相對於球狀星團，疏散星團嘅密度其實好低，而引力約束都好細，過一排就會因為巨大分子雲同其他星團嘅引力而瓦解。

圖一

圖二

圖三

資料來源：維基百科
圖片來源：星河科研社、維基百科

iheby

「一啖天文」(29) - 天關客星 Yuen Hoi Hang
20171229

相信大家睇到呢張相都唔會陌生，佢就係梅西耶天體目錄既第1號天體 - M1 蟹狀星雲 (天關客星)。

蟹狀星雲係位於金牛座ζ星（天關）東北面既一個超新星殘骸，距離地球大約6,500光年。雖然佢睇落好似係靜止，但其實佢係以每秒1,500公里既速度膨脹。佢係1054年喺金牛座爆發既一粒超新星。而喺1969年，天文學家就發現星雲既中心係一粒脈衝星。

而蟹狀星雲有另一個名：天關客星。古時有啲突然出現又突然消失既星體，例如彗星、新星同超新星，學者都會稱呼佢地做客星。因為佢地唔會喺天上既同一位置停留太耐，來無影，去無蹤，就好似過客一樣，所以就叫客星。而蟹狀星雲就出現喺天關附近，咁佢就叫做天關客星。

古代好多既中國天文學家都記錄左呢次超新星爆炸。根據中國史籍既記錄可以推斷，呢粒超新星喺日頭有23日可見，而夜晚可見既時間就持續左22個月。

超新星爆炸真係難得一遇。唔知我地將來會唔會都見到超新星爆炸呢?



參考資料、圖片來源：Wikipedia