找回密碼
 申請討論區帳戶
查看: 11328|回復: 32

一啖天文 2017.12

[複製鏈接]
發表於 2017-12-5 11:12:25 | 顯示全部樓層 |閱讀模式
本帖最後由 iheby 於 2017-12-31 12:13 編輯

學界天文 群組 @FaceBook.com
「『一啖天文』 - Intro
呢個12月,我地將會推出一個計劃叫做『一啖天文』。我地希望可以每日都同大家分享小小天文資訊,令大家係繁忙生活時用電話都可以學到天文。
呢個計劃為期一個月,會有唔同既朋友仔上黎分享,記住得閒就留意下呢個group啦!
希望大家會踴躍支持,多啲留言同一齊討論!記得share比啲朋友仔睇,一齊黎咬一啖天文喇!」



Dorothy Fung
Mei Wong
Yuen Hoi Hang
康芷欣
1


2


3


4


5


6


7


8


9


10


11


12


13


14


15


16


17


18


19


20


21


22


23


24


星雲
25


26


27


28


星團
29


30


31

 樓主| 發表於 2017-12-5 11:26:14 | 顯示全部樓層
本帖最後由 iheby 於 2017-12-5 12:55 編輯

「一啖天文」(1) - 土星環 Dorothy Fung
20171201
土星環相信大家都聽過同睇過,今日就黎講下佢啦!
土星環睇落好似一個大圓盤咁,但其實入面係一啲小碎石。呢啲碎石既成份包括水冰,塵埃同其他化學物質。佢既形成有兩種講法﹕
(1) 土星嘅衛星會因為引力而落入土星嘅洛希極限範圍內,然後衛星被土星嘅潮汐力扯碎,形成土星環;
(2) 環唔係由衛星碎片組成,係由土星既原星雲中直接形成。
有冇諗過點解土星環既小碎石唔會合番埋做一粒衛星呢?其實環中既小碎石會因為彼此之間既碰撞並聚合成一個較大既碎石,但當呢啲碎石去到特定大細時,就會因為行星既引力而唔比佢地繼續增長。之後呢啲較大既碎石會互相碰撞而撞散。所以土星環既小碎石唔能夠聚合成一個更大的星體。





參考資料: wikipedia,百度
圖片來源: nasa
 樓主| 發表於 2017-12-5 11:32:34 | 顯示全部樓層
本帖最後由 iheby 於 2017-12-28 11:25 編輯

一啖天文 (2) - 東南西北(1) Mei Wong
20171202
琴日介紹咗好奇幻嘅土星環俾大家知。之後就講下點樣透過睇星星去辨別東南西北喇!今日先講點樣辨認到北面先!
依家地球自轉軸嘅北頂大概指向小熊座的尾巴—北極星(勾陳一),所以身處北半球,就可以靠搵北極星去辨認到北方。但究竟點先搵到北極星呢?方法有以下兩個: (一)北斗七星,(二)仙后座
(一)北斗七星
係春夏季,可以搵大熊座中最耀眼嘅北斗七星(Big Dipper),形狀好似古代盛酒嘅斗形。而由斗口至斗杓連線順序名為天樞、天璇、天璣、天權、玉衡、開陽和瑤光。將天樞、天璇兩顆星連起,再將佢地嘅間距延長五倍,搵到一粒光星就係北極星。(圖一)
(二)仙后座
係秋冬季,就可以利用仙后座(Cassiopeia),形似如M或W或3字,將兩側向後延伸的交點同中間個一顆星嘅間距延長5倍,形狀好似弓箭。同樣地,搵到一粒光星就係北極星。(圖一)
但由於地球好似個轉動梗嘅陀螺,自轉軸會有周期性嘅擺動,呢個運動稱之為歲差(Axial Precession),所以北極星唔會永遠都係小熊座嘅勾陳一。以往天琴座嘅織女星、天龍座嘅右樞都成為過北極星。而未來,仙王座嘅少衛增八、上衛增一都會因為歲差運動而成為北極星。(圖二、三)

圖一

圖二

圖三

參考、圖片來源:可觀自然教育中心暨天文館,Wikipedia,Google
 樓主| 發表於 2017-12-5 11:42:00 | 顯示全部樓層
本帖最後由 iheby 於 2017-12-5 13:02 編輯

「一啖天文」(3) - 散射(1) Yuen Hoi Hang
20171203
唔知大家有冇諗過喺日頭都可以觀星呢?
有好多人認為日頭唔可以觀星既原因係因為太陽既光太強,所以會遮到其他星體既光。但其實呢個講法係有啲謬誤既。
喺地球既日頭之所以睇唔到星,原來係同地球既大氣層有關。當太陽光進入地球大氣層既時候,光線會因為氣體或其他粒子而改變佢既路徑,呢種現象稱之為散射(Scattering)。粒子將太陽光散射,而呢啲光足夠覆蓋背景既星光,所以日頭就無辦法觀星。
我地可以睇下Stellarium模擬地球有大氣層同冇大氣層時既情況。上圖係有大氣層,因為太陽光既散射而睇唔到其他既星體。但當下圖「熄」左大氣層既時候,我地就可以清楚咁睇到銀河同其他星體。
所以,假如地球冇左大氣層既話,我地係可以喺日頭觀星架!



參考資料:維基百科
圖片來源:Stellarium


 樓主| 發表於 2017-12-5 11:52:07 | 顯示全部樓層
本帖最後由 iheby 於 2017-12-28 11:25 編輯

「一啖天文」(4) - 行星環 Dorothy Fung
20171204
除咗最出名既土星環,大家又知唔知木星,天王星同海王星都有行星環呢?
木星環主要由塵埃組成,細分為四部分,最裡面由粒子組成厚厚一層叫做「光環」,比較光但特別薄既係「主環」,仲有兩個外部厚又隱約既「薄紗環」。環狀係由木衛十五同十六,加上其他細小既主體因高速撞擊噴射出既塵埃而形成既。(圖一,二,三)
天王星環係由細小既黑暗顆粒物質組成既暗淡環系統,主要由微粒同塵埃組成。估計成因可能係一次高速既撞擊或潮汐力扯碎衛星一部分而形成咗碎片環。(圖四,五)
海王星環裡面既灰塵比例較高,環裡有冰同有機物既混合物。同木星環比較相似,係由唔同既麈埃粒子組成既。環狀既成因相信同天王星環非常相近。(圖六,七)

圖一

圖二

圖三

圖四

圖五

圖六

圖七

參考資料: wikipedia, nasa
圖片來源: nasa, netexx
 樓主| 發表於 2017-12-5 12:50:03 | 顯示全部樓層
本帖最後由 iheby 於 2017-12-28 11:25 編輯

一啖天文(5) -東南西北(2) Mei Wong
20171205
上次利用北斗七星同仙后座搵到北面之後,背向自己個面自然就係南面。而淨底嘅東西面就可以透過星星東升西落嘅原理,做一個動作得知。
將右手整個Tick號,再將食指指向北極星,由右至左轉動,模擬星星東升西落,咁就辨別到東同西面喇!(片一)
但其實星星東升西落係種錯覺黎嫁!我地之所以睇到星星東升西落,都係因地球自轉而造成嘅。地球持續由西向東自轉,而我地身處係地球又感覺唔到佢嘅運動,反而會覺得成個天球都由東向西繞著地球旋轉,咁就造成星星東升西落嘅錯覺喇。(圖一)
最後可能有人會問,係南半球又或者赤道附近,見唔到北極星嘅時候,又可以點樣睇星星辨別方向呢?咁就留意下一啖天文喇!

片一

圖一

參考、圖片來源:宇宙的本質
 樓主| 發表於 2017-12-6 20:11:41 | 顯示全部樓層
本帖最後由 iheby 於 2017-12-28 11:26 編輯

「一啖天文」(6) - 散射(2) Yuen Hoi Hang
20171206
上一次講到日頭之所以睇唔到星係因為大氣層將太陽光散射。但大家有冇諗過,原來天空既顏色都係同大氣層同光線散射有關!
我地好多時都會見到日頭大部份既時間,個天都係呈藍色,而日出或者日落既時候,個天會呈橙紅色。究竟點解個天會出現唔同顏色呢?
太陽光既顏色本身係白色(即係白光),但當太陽光進入大氣層時就會散射。由於藍光既波長比紅光短,所以藍光會比紅光更容易被散射。而太陽喺日出或日落時所穿過既大氣層比較厚,大部分既藍光已經喺大氣層外層被散射,所以只剩低紅光,所以日出或者日落時天空會呈橙紅色;相反地,喺其餘既日頭時間,大陽光穿過較薄既大氣層,藍光就可以被散射到整個天空,所以天空會呈藍色(圖1)。
至於點解明明紫光比藍光既波長更短,但因為人眼對藍光既敏感度比紫光更強,所以我地見到既天空係藍色而唔係紫色。
而因為月球冇大氣層既關係,冇任何粒子可以散射陽光,所以喺月球上睇既天空會係黑色。(圖2)

圖1

圖2

參考資料:維基百科
圖片來源:Youtube 佑來了, NASA
 樓主| 發表於 2017-12-7 15:48:31 | 顯示全部樓層
本帖最後由 iheby 於 2017-12-12 00:08 編輯

「一啖天文」(7)- 雙子座流星雨 康芷欣
20171207
唔知大家有冇親眼睇過流星雨呢?可能對住流星許願就多,不過你哋又知唔知佢地係點嚟嘅呢?不如今日就為大家介紹下雙子座流星雨啦!
雙子座流星雨係以雙子座附近為輻射點出現嘅流星雨。流星係宇宙中被稱為流星體的碎片,大部分嘅流星體都比沙礫仲細,因此幾乎所有嘅流星體喺降落地面前,都會喺大氣層內被燃燒殆盡,並唔會擊中地球嘅表面。而輻射點即係流星雨係天空中嘅發源處,流星嘅來向,就係集中在呢個點。如果個粒流星開頭嘅路徑唔可以指去輻射點,咁呢顆流星就唔屬於流星雨,而係被稱為散亂流星或偶發流星。
雙子座流星雨有三大特點:
1.顏色偏白 亮度大
2.流星體速度較慢
3.經常有顆流星出現
雙子座流星雨同象限儀座流星雨、英仙座流星雨堪稱係北半球三大流星雨架!
雙子座流星雨出現嘅時間大概會係12月頭至中,高峰期會係12月14號,嚟緊大家不妨試下帶埋星圖、紅光電筒同地蓆去睇呢個咁特別嘅天文現象啦!????



參考資料: 維基百科、香港太空館
圖片來源:《中國國家天文》資深作者Steed的攝影作品
 樓主| 發表於 2017-12-8 10:13:56 | 顯示全部樓層
本帖最後由 iheby 於 2017-12-29 12:18 編輯

「一啖天文」(8) - 彗星,小行星同流星既分別 Dorothy Fung
20171208
究竟彗星,小行星同流星可以點分辨?以下就簡單講下佢地既異同啦!
小行星(Asteroid)係比較大既岩石,近地球既小行星絕大部分都係來自小行星帶,受到擾動改變咗繞日軌道時並朝太陽而來既,因而接近地球。
彗星(Comets)同小行星好相似,但組成成份所含既甲烷或氨等冰質較多,結構比較鬆散,因而物質被蒸發時就會係天上形成彗髮同彗尾。彗星主要分兩種,長週期(繞日週期200年以上) 同短週期(繞日週期少於200年)。
流星體(Meteoroid)係比小行星細既太空岩碎石,直徑1公里至數毫米不等,直徑越小,數量越多。絕大部分既流星體係進入大氣時已經完全蒸發,無法抵達表面,但亦會有例外:
- 流星(Meteor),係指夜晚睇到劃過天空既果道光,係流星體進入大氣後同大氣磨擦生熱既「現象」,而唔係指流星體本身。
- 隕石(Meteorite)成功熬過大氣既煎熬,最後「著陸」地球表面,呢種碎石就係叫隕石,大小可從唔夠一公克(沙咁大粒) 到100公斤重,甚至更大,足以引起致命災害。



[YouTube=320,180]https://www.youtube.com/watch?v=rVdniqc_G_Q[/YouTube] 英文詳細解釋影片

參考資料: Universe Today
圖片來源: Tim Lillis
影片來源: Royal Observatory Greenwich
 樓主| 發表於 2017-12-9 18:54:51 | 顯示全部樓層
「一啖天文」(9) - 宇宙微波背景 Yuen Hoi Hang
20171209
唔知大家有冇試過喺聽收音機調較頻道既時候,會聽到好嘈既「沙沙」聲呢? 其實呢啲「沙沙」聲係來自宇宙微波背景(CMB, Cosmic microwave background)。
宇宙微波背景係大爆炸(Big Bang)所遺留落嚟既一種輻射,並且充斥住成個宇宙。由於宇宙喺大爆炸後不斷膨脹,但宇宙既溫度不斷下降,使得電磁波既波長不斷增加。而呢種輻射既頻率係屬於微波既範圍,所以「微波」因而得名。但係大家又唔好覺得呢種輻射冇用,其實佢係支持大爆炸理論既最好證據嚟!
大家用正常既光學望遠鏡睇星既時候,會發現恆星同恆星之間(稱為背景)睇落係漆黑一片。但如果利用射電望遠鏡(圖2)嚟睇呢啲背景既話,就會發現有一啲好微弱既光,而呢啲光就係宇宙微波背景!
所以,大家喺聽收音機時聽到既「沙沙」聲,其實係喺遠古宇宙留低既美妙音樂嚟架!


圖1:根據WMAP對宇宙微波背景輻射既觀測所繪製既圖像


圖2:位於澳大利亞新南威爾斯州帕克斯天文台的既64米口徑射電望遠鏡

參考資料:維基百科
圖片來源:NASA
您需要登錄後才可以回帖 登錄 | 申請討論區帳戶

本版積分規則

Archiver|手機版|小黑屋|香港天文學會

GMT+8, 2024-3-19 15:28 , Processed in 0.014298 second(s), 16 queries .

Powered by Discuz! X3.5

© 2001-2024 Discuz! Team.

快速回復 返回頂部 返回列表