搜索
樓主: iheby

一啖天文 2017.12

[複製鏈接]
 樓主| 發表於 2017-12-10 09:14:09 | 顯示全部樓層
本帖最後由 iheby 於 2017-12-10 09:59 編輯

「一啖天文」(10) - 月亮既顏色 Dorothy Fung‎
20171210
當我地睇月亮既時候,有時會見到唔同顏色既月亮,又知唔知點解呢?
天氣晴朗既時候,我地可以見到銀白色既月亮,天氣冇咁好既時候,月亮會呈黃色。呢兩種顏色既變化,係由大氣中既顆粒物導致既。月亮反射既係太陽光,當夜空比較晴朗,塵埃同水氣比較少既時候,太陽既七種色都能夠順利抵達地球,七種光混合後就係白色;係另一個情況下,大氣會吸收或散射唔同波長既光,尤其波長較短既青、藍、紫光最容易被吸收或散射。冇咁易被吸收同散射既紅、橙、黃同綠色就可以抵達地面,呈現出混合後既黃色月亮。
當大氣中既水蒸氣較多既時候,綠光都會被過濾咗,呢個時候月亮就會係橙紅色。參考番Henry之前講既散射,月全食既時候,會呈現一種暗紅色,係由地球大氣反射而導致既。地球位於日月之間,但仍然有小部分陽光會被大氣層折射而越過地球,進入地球既陰影範圍,並到達月球。我地睇到既暗紅色月光,就係月亮將呢部分既光反射番黎既結果。





參考資料: 科普中國
圖片來源: Cheuk Yin Mong
 樓主| 發表於 2017-12-12 00:06:21 | 顯示全部樓層
一啖天文(11) - 東南西北(3) Mei Wong
20171211
如果大家有機會去南半球又或者赤道附近嘅地方旅行,見唔到北極星嘅時候,又可以點樣睇星星辨別方向呢?
係南半球,可以搵南十字座(Crux)黎辨認南方。南十字座由五顆星組成,將四顆最光嘅恆星連成十字。將十字長D個一筆向前伸延五倍,再係嗰個位畫條直線連到地面,就係南方啦。同樣地,背面就係北面。而向住南方用左手做剔號,從左至右轉動,就會係東至西啦。(圖一)
而係赤道,就可以搵獵戶座(Orion)黎認方向。首先介紹下獵戶座先,大家可以想像佢係一個左手拎住盾,右手拎住劍嘅獵人(圖二)。而三粒成一直線嘅星星就係佢嘅腰帶,而腰帶喺赤道上嘅位置係唔會點變嘅。盾牌就係由五/六粒星成弧形組成嘅。腰帶嗰三粒星係由東至西並排,東係劍個面,西係盾個面,而獵人嘅頭就係指住北方啦。(圖三)
幻想唔到嘅可以比較下圖二同圖三,會清晰D分到個頭、劍同盾牌。其實獵戶座仲有好多深空天體,例如獵戶座大星雲(M42,M43),馬頭星雲,火焰星雲,巫婆星雲等。有機會介紹下啦。

圖一

圖二

圖三

參考、圖片來源:wikihow , Stardate
 樓主| 發表於 2017-12-12 13:10:31 | 顯示全部樓層
本帖最後由 iheby 於 2017-12-12 13:11 編輯

「一啖天文」(12) - 一閃一閃小星星 Yuen Hoi Hang
20171212

「一閃一閃小星星」呢首歌仔我地成日聽,但係點解星星會閃架呢? 我地成日都聽人講話係因為大氣既擾動,所以星星先會閃下閃下。但其實呢個說法都唔係完全正確既。

單純既大氣擾動我地稱之為風。但風既速度唔會快得過光速,所以大氣既擾動唔會令到星星閃爍。而正確既說法應該係:空氣既溫度變化令到星星閃爍。由於光進入空氣既時候會改變方向(即係散射)。冷空氣會令光既散射程度較大,而熱空氣就較少。所以當星光進入地球既大氣層之後,星光會被唔同溫度既空氣散射(一般嚟講地面較熱,天空較冷),就令到星星識得閃啦!

而點解太陽同月亮都唔會閃爍呢? 因為太陽同月球比較接近地球,大部分既光線都進入到大氣層。即使部分既光線被散射,我地仍然可以接收到其他既光線,所以太陽同月亮睇落會係唔會閃既(左圖)。而其他既星體就遠離地球好多,所以基本上只有一條光線可以到達地球(右圖)。由於得一條光線既關係,所以佢就好容易被散射,所以就會閃下閃下!


圖1:模擬有好多太陽光抵達地球;圖2:模擬其他好遠既星體只有一條光線抵達地球

參考資料:香港天文台
圖片來源:Hoi Hang Yuen
 樓主| 發表於 2017-12-13 22:48:47 | 顯示全部樓層
「一啖天文」(13) - 極光 Dorothy Fung
20171213
極光大家就聽得多,睇相睇得多啦,但又知唔知道佢既成因呢?
極光(Aurora)係係高緯度(即北極同南極)既天空中,太陽帶電既高能量粒子同地球高層大氣中既原子碰撞造成既發光現象。極光唔單只係地球上出現,太陽系內有磁場既行星上都可以見到極光。
極光係地球上一種大規模既放電過程。帶電粒子去到地球附近,磁場迫使佢地沿著磁場線集中去到南北兩極。當佢地進入高層大氣時,會同大氣中既原子同分子碰撞並激發能量,產生出黎既光芒就係極光啦。
地球上既極光主要有紅、綠二種顏色,係由氮同氧原子被電子激發導致而成既。氧既輻射會係綠色或者褐紅色,而氮既輻射會係藍色或紫色。


圖一:綠色既極光


圖二:偏粉紅既極光

參考資料:wikipedia
圖片來源:nasa, clapway
 樓主| 發表於 2017-12-15 13:12:49 | 顯示全部樓層
一啖天文(14)-日食(日全食、日偏食)康芷欣
20171214

大家有冇留意過係上年嘅3月9號發生嘅果次日全食?又知唔知點解香港睇到嘅又係日偏食呢?

日食係只會係月球運行至太陽與地球之間果陣發生。日食分為三種,包括日全食、日環食、日偏食,其中比較罕見嘅係日環食。而唔同地區會出現嘅日食種類都唔不同。就好似2016年果次日全食咁,某啲地區睇到嘅係日全食,例如印尼;某啲地區睇到嘅就係日偏食;例如香港、日本。

太陽同地球嘅距離係月球同地球嘅距離嘅400倍,所以日全食通常只可以係地球上一個非常細嘅區域見到。由於對稱嘅關係,月球的暗影其實就係地球表面的陰影,對正啱嘅距離嘅話,即係三者啱啱好係一條直綫果陣(圖一),月球就會遮住太陽射向地球嘅光,月球後面嘅黑影會落去地球,果陣就會淨低一個光環,即係日冕,呢個就係日全食(Total solar eclipse)(圖二)啦。

而點解會有日偏食(Partial solar eclipse)呢?月球圍繞地球的軌道和地球圍繞太陽的軌道都唔係正圓,所以日、月同地球之間嘅距離時近時遠。觀測者係地球上嘅位置唔同,而月球到地球嘅距離又唔同,觀測者係月球嘅半影區入面,觀測者會睇到一部分嘅太陽被月球的陰影遮蓋,但另一部分會繼續發光。太陽和月球只有部分重合,所以會跟據太陽被月球遮蓋嘅最大直徑來衡量食嘅大小。通常日偏食係伴隨住其他食相發生,例如日全食/日環食。

其實係日食前最後一刻和日全食後的第一刻會出現一個好特別嘅現象,就係「鑽石環效應」(圖三)啦。啲光係月亮表面嘅環形山縫隙透出係日面上嘅小型光點,並且同形成日冕連成一片,就形成左呢個好似鑽石嘅光環。

日食過程:初虧、(食既)、食甚、(生光)、復圓
而其中食既、生光都只會係日全食果陣先會發生。

圖一

圖二

圖三

參考資料:維基百科
圖片來源: Business insider(圖一) Nissen Lam(圖二) ig:___jennica___ (圖三)
 樓主| 發表於 2017-12-16 15:47:10 | 顯示全部樓層
一啖天文(15)-恆星的死亡 Mei Wong
20171215
唔知你地有冇諗過我地頭頂嘅恆星係會死亡嘅呢,而你又知唔知佢地死亡嘅過程係點呢?
要講恆星嘅死亡,大家首先要知道恆星係由咩組成。簡單嚟講,恆星係一大團氣體(主要係氫氣同氦氣)。但呢啲氣體終會有耗盡嘅一日。
當恆星死亡嘅時候,恆星內部嘅核能量(即氫同氦)會盡耗而開始塌縮。而開始嘅時候,呢種塌落黎嘅重力會令恆星內部溫度升高,高到足以引發核爆炸。呢種爆炸力唔單止支持住恆星抗拒重力,同時亦係令恆星發光嘅原因。之後,恆星又會再一次塌縮。而跟住落黎粒恆星會點發展呢,就取決於粒恆星系初始階段擁有幾多質量,同埋有咩力可以阻抗重力。
質量大小同太陽類似嘅恆星(低於1.4個太陽質量),佢嘅重力可以將所有嘢都緊密壓縮喺一齊,但最終都會因為原子結構令重力作用停頓,變成白矮星(White Dwarf)。白矮星被認為喺中、低質量恆星演化階段嘅最終產物。白矮星嘅密度極高,但一粒質量同太陽差唔多嘅白矮星,體積只係同地球咁上下。
而恆星質量比太陽大少少(介於1.4到3個太陽質量),咁就連原子結構都無辦法抗阻重力作用,佢會一直壓縮,成為一粒巨大嘅原子核,形成一粒中子星(Neutron Star)。
如果恆星質量比太陽大好多(多於3.2個太陽質量),咁就無嘢可以阻擋到佢嘅重力壓縮。恆星會塌縮到一個唔存在嘅狀態,成為左一個無盡頭嘅無底洞—黑洞(Black Hole)。佢嘅重力非常強,強到連光都會吸左入去,出唔翻黎。
而變成白矮星、中子星或者黑洞之前,仲會涉及超新星、紅巨星、紅超巨星等等,不過喺呢一啖就無詳細講,但大家可以參考下圖一。
不過恆星同人類唔同,恆星究竟點死亡,係佢地未發出第一道光之前就已經決定左!而我地頭頂上面嘅咁多星星,究竟系點分辨呢?咁就要留意下一啖天文!

圖一

參考資料: 中研院天文所季報
圖片來源: Google
 樓主| 發表於 2017-12-16 15:50:55 | 顯示全部樓層
「一啖天文」(16) - 小行星帶 Dorothy Fung
20171216
係太陽系入面,除咗八大行星之外,大家又知唔火星同木星中間隔住咗一個小行星帶呢?
小行星帶係太陽系內位於火星和木星軌道之間既小行星密集區域,絕大部分被發現既小行星都係由岩石或金屬組成。因為比較上呢個係小行星最密集既區域,所以呢個區域又被稱為主小行星帶,簡稱「主帶」。
小行星帶係由太陽星雲中既一群星子(細過行星既行星前身)形成既。木星巨大既引力阻礙咗星子形成行星,並導致星子之間高能量既碰撞,造成許多殘骸同碎片。係主帶內既小行星依照佢地既色彩同主要成份分成三類:碳質、矽酸鹽同金屬,而小行星之間既碰撞更可能形成擁有相似軌道特徵既小行星族。
咁點解小行星帶碎片又唔可以合翻埋做一粒行星呢?首先,小行星帶既物質總和只有月亮既4%,根本唔夠物質去組成一個行星。其次,木星既引力非常之大,會造成小行星帶內有幾個空隙,導致碎片唔能夠重組。





參考資料: wikipedia, universe today
圖片來源: 頭條日報, 台灣word
 樓主| 發表於 2017-12-17 22:13:44 | 顯示全部樓層
「一啖天文」(17) - 杜林危險指數 Yuen Hoi Hang
20171217

太陽系除左太陽,行星同衛星之外,亦都存在好多唔同既小行星同彗星。當呢啲小天體接近地球既時候,天文學家就會用唔同既指標去量度呢啲小天體的危險程度。而其中一個簡單易明既指標,就係杜林危險指數 (Torino scale) 啦!

杜林危險指數介乎於0至10。X軸代表天體撞擊地球既機率;而Y軸就代表破壞能量 (以MT為單位,每1MT等於77個廣島原子彈既威力)。而呢個指數亦都用左5種顏色去代表唔同級數,分別係白、綠、黃、橙、紅。下面將會簡單咁介紹下:

白色(無危險)(0級)代表天體撞擊地球既機率係0或者近乎0;或者喺大氣層已經燃燒殆盡既天體,例如流星。

綠色(正常)(1級)代表天文學家例行地發現近地天體,而天體唔會對地球造成影響。

黃色(需要天文學家注意)(2-4級)代表已經發現到近地物體,而物體會有1%或以上既機率會撞擊地球並且會造成小範圍既損毀。

橙色(威脅)(5-7級)代表有近地物體接近地球,並且可能會帶嚟區域性或者全球性既災難。但天文學家仍未確定呢個天體會唔會撞擊地球,並且需要極度關注。

紅色(肯定發生撞撃)(8-10級)代表天體必定會撞擊地球,並且可能會帶嚟區域性或者全球性既災難。

但大家睇完之後又唔洗擔心! 因為到目前為止,杜林危險指數既最高記錄都只係第4級(黃色)。而呢個記錄既「創造者」係小行星99942,佢既直徑係400米。

如果大家想知道流星同隕石有咩分別,可以睇返#8既「一啖天文」!



參考資料、圖片來源:Wikipedia
 樓主| 發表於 2017-12-18 15:45:16 | 顯示全部樓層
一啖天文(18)-恆星光譜 Mei Wong
20171218

Oh Be A Fine Guy/Girl Kiss Me
呢句嘢咁情情塔塔究竟關天文咩事呢?

其實透過呢句嘢就可以將天上面嘅星星有系統咁分類啦。睇落去再開????!

係天文學,恆星分類係將恆星依照光球嘅溫度分門別類,伴隨住嘅係光譜特性、同之後衍生出黎嘅各種性質。恆星光譜學就根據光譜嘅吸收譜線黎分類:因為係一定嘅溫度範圍內,只有特定嘅譜線會被吸收,所以檢視光譜中被吸收嘅譜線,就可以確定恆星嘅溫度。

而到左20世紀初,美國哈佛大學天文台對50萬粒恆星進行左光譜研究。根據恆星唔同嘅譜線進行了分類,大概分為O.B.A.F.G.K.M七種。

光譜型 温度 顏色
O ≥ 30,000 K 藍色
B 10,000–30,000 K 藍白色
A 7,500–10,000 K 白色
F 6,000–7,500 K 黃白色
G 5,200–6,000 K 黃色
K 3,700–5,200 K 橙色
M 2,400–3,700 K 紅色

大家係圖一(赫羅圖)橫軸可以見到光譜類型同恆星嘅表面溫度,從左至右遞減。而不同恆星隨住表面溫度嘅不一而有唔同嘅顏色,溫度較高嘅顯藍色,次之顯白色,好似就黎燃盡而膨脹嘅紅巨星表面溫度只有2000-3000K,因而顯紅色。

咦,睇到呢到有冇發現到恆星嘅光譜型同Oh be A Fine Girl/Guy Kiss Me嘅關係呢?無錯啦,呢句就係記七種恆星光譜型嘅口訣啦。

仲有首歌講恆星分類嘅 ,歌名正正就係Oh Be A Fine Girl Kiss Me。聽得多會好自然記得唒D嘢,下次睇星可以唱哈哈。

[YouTube=320,180]https://www.youtube.com/watch?v=6D40yRy7QuA[/YouTube]

圖一:赫羅圖

參考資料: Wikipedia
圖片來源: 中研院天文所季報
 樓主| 發表於 2017-12-23 12:50:09 | 顯示全部樓層
「一啖天文」(19) - 第13個黃道星座!? Dorothy Fung
20171219

早排大家都討論緊究竟黃道有12定13個星座,而第13個又係咩星座嚟架呢?今日就嚟探討下呢個問題啦!

首先我地喺地球表面會覺得所有天體都圍繞我地轉動,所以我地就會覺得所有星星都係東升西落,包括太陽。而太陽喺天空上面運行嘅軌道就係黃道。而黃道帶嘅星座係有13個嘅,當中包括我地熟悉嘅12星座同蛇夫座。

第13個黃道星座叫蛇夫座,佢係位於天蠍座同人馬座之間,係屬於黃道帶入面。咁點解係占星術裡面又冇提及過蛇夫座既?

由於古時嘅人對天區嘅劃分同依加唔同,所以占星術就冇將蛇夫座納入黃道十二宮。而自1928年,國際天文學聯會規範星座邊界之後,就決定將蛇夫座列為黃道星座喇!即使蛇夫座被列為黃道星座,佢都唔會影響到占星術嘅黃道12星座。因為天文學同占星術係兩樣唔同嘅範疇嚟!





參考資料: wikipedia
圖片來源: wikipedia, 香港太空館
您需要登錄後才可以回帖 登錄 | 申請討論區帳戶

本版積分規則

手機版|Archiver|香港天文學會  

GMT+8, 2018-11-19 17:47 , Processed in 0.026020 second(s), 30 queries .

Powered by Discuz! X3.4

© 2001-2013 Design S!|平潭

快速回復 返回頂部 返回列表